Shan Sano, Balse La Moodo 10 Sano Oo Shaqa Ah

 

Shalay oo Sabti ahayd (13-8-2022) waxaan aniga iyo howl wadeenada Wasaaradda  Qorshyenta Maalgashiga iyo Horumarinta Dhaqaalaha Xukuumadda Soomaaliya aan kawada qeyb galnay, xafladda uu xilka ku wareejinaayay wasiirkeenii hore ee Wasaaradda Qorsheynta Qaranka Amb Jamal Maxamed Xasan. Waxaan rabaa dhoor shay oo mudadii aan wasaaradda joogay wasiirkuna uu xafiiska joogay oo aan ku xasuusto inaan idin-la wadaago.

Qofwalbaa daah kama saarna Wasaarada Qorsheynta Qaranka inay kamid tahay wasaaradaha lafdhabarta u ah, horey usocodka iyo dhismaha dowladnimo ee dalkeenna. Wasaaraddda Qorsheynta oo baahi badan u qabtay inay markale cagaheeda ku istaagto si ay tiir ugu noqoto dowldanimada curdunka ah ee mardhow lasoo uskamay, 5-tii bishii afaraad sanaddii 2017 waxaa xilka WQQ la wareegay, Wasiir Jamal Maxamed Xasan. Amb Jamal waxaa uu xiligaas Wasaaradda kala wareegay Wasiir Cabdiraxman Caynte oo isagana muddadii wasaaradda uu joogay waxbadan oo lataaban karo ku kordhiyay. Waana taqaanayo, dowladnimadu waa qori isku dhib, qofna meel buu geeyaa, qof kalaa maeshii kasii wadaa.

Wasiir Jamal waxa uu kusoo aaday Dowlada Soomaaliya oo markii ugu horeysay isku diyaarinaysay fulinta iyo hirgalinta, Qorshaha Hormarinta Qaranka 8aad oo uu diyaariyay Wasiirkii ka horeeyay, Cabdiraxman Caynte, waxayna ahayd markii ugu horeysay oo ay dowladda Soomaaliya sameeyso QHQ 8aad, burburkii ka dib. Wasiir Jamal oo kaa shanaaya howl-wadeenada wasaaradda ayaa ku guuleystay inuu fuliyo qorshahaas oo marka la’eego inta aan anigu shaqsiyan ka warqabo uu ahaa qorshe aad u balaaran, balse Wasiir Jamal waxaa uu u dhabar adeegay, inuu fulo qorshahaas.

Wasiir Jamal xiligii uu wasaaradda imanayay waxaa dalka markaas uu ku jiray xaalad adag oo abaar ah oo dalka oo dhan saameyn lixaad leh ku yeeshay, waxa uuna durba la-falgalay diyaarinta Warbixinada abaaraha la-xiriira ee xiligaas taagnaa ee dalka ka jiray oo qiimeyn lagu sameeyay, saaameynta ama xajmiga ay geeysteen qorshahaas oo loo yaqaanay, DINA. Sidoo kale wuxuu amb. Jamal uu ku guuleystay Qorshaha dib u kabashada Abaaraha ee RRF oo Mashriicda xiligaas jiray ay ka dhalatay.

Waxyaabaha kale ee aan ka xusi karo muddadii uu Wasiir Jamal uu Wasaaradda Qorsheynta Qaranka uu joogay, waxaa kaloo kamid ahaa; wuxuu wasiirku ku daddaalay oo uu waqti badan ku bixiyay in Hay’adaha kaalmeeya Dowladda Soomaaliya inay ka howlgalaan Gudaha Somaaliya, halkanna ay xafiisyadooda ka furtaan kana sooguuran halkii marka hore saldhiga u ahayd ee Kenya iyo dalal kale oo dariska ah, taas oo fursad u ahayd dalka marka laga-eego dhaqaale ahaan, sidoo kalena ay Shaqo abuur ay u noqotay dhallinyaro badan.

Markale Waiir Jamal wuxuu u tafaxeetay, diyaarinta Qorshaha Hormarinta Qaranka 9aad, balse markan waa ay ka duwaneyd oo laga soo bilaabbo degmo ilaa tuulo ayaa laga talagiliyay QHQ-9aad, kaas oo dadka laga tala giliyay ay gaarayaan ku dhawaaad kun 1,000 qofood oo meela kala duwan kala joogay. Sababta sidaas loo sameeyay ayaa ahayd in uu qorshuhu ku cadaa baahiyaha dalka, qeyb walbaa oo kamid ah.

Wasiir Jamal waxa uu sidoo kale shaqooyinkii waa weynaa ee qofkastaa oo Soomaaliyeed uu og yahay oo lagu xasuusan donnaa, Hirgalinta Hay’adda Istaatistikada Qaranka oo ah hay’add madaxbanaan taas oo uu dalka iyo Wasaaradubba baahi badan u qabay. Yaanan ka tagin oo ilaabin sidoo kale, Dhismaha Golaha Dhaqaalaha Qaranka oo laf-dhabar u ah Horumarka dalkeenna ayuu hirgiliyay amb. Jamal. Wasiir Jamal Maxamed Xasan ma umaleenaayo in aan qormo kusoo koobi kara shaqooyinkii dalkan uu u qabtay mudadii uu wasiirka ahaa, hadana intii aan isleeyahay qalinkaagu wuu qaban karaa oo najaxay waxaa kamid ahaa; Wasiirku intuu wasaaradda joogay wuxuu daadajiyay dhammaan Mashaariicda wasaaradda soo gala oo uu gaarsiyay tuulo ilaa heer Degmo taas oo ahayd mid xor ah oo ka madax-banaan, wax is-daba marin iyo musuq-maasuq.

Ugu danbeyn haddii aad ii ogolaataan waxaan rabaa inaan kusoo xiro, howlihii baaxadda lahaa oo in ka badan shan-sao oo uu wasiir ahaa, Amb. Jamal wuxuu dhisay, Dhismaha cusub ee Wasaaradda Qorsheynta kaas oo muddo ay socotay dhismeheeda, waxaana xariga ka jaray Madaxa Sare xiligaas xukunka joogay. Shansano iyo billooyin oo ay dowladdii hore jirtay, iskuna badeleen ama xafiiska yimaadeen labo Ra’iisul Wasaare, Wasiir Jamal labad Xukuumadood waa uu kasoo muuqday. Mudane Jamaal Maxamed Xasan waa wasiirkii ugu waqtiga dheeraa burburkii ka dib ee wasaaradda soo mara.

 

Shaqsiyan, maxaan ka bartay Cabdirashiid ahaan Wasiir Jamal muddadii aan Wasaaradda joogay?

Amb. Jamal wuxuu ii ahaa walal iyo Saaxiib, ma aqaan marka labadaas la-isku daro wax ka weyn ee aan dhihi karo, hadana waa shaqsi dowladanimada laf dhabar u ahaa-una ahaan doonno. Waa midkamid ah dadka aadka loo jecel yahay hoggaamintiisa, af-gaaban oo og, waxa uu qabanaayo, waxkastaana ay kala weyn yihiin, hormarka Dalkan. Casharadii aan ka bartay waxaa fiicnaan lahayd maalin kale inaan qalin u qaato, sababtoo ah intaas laguma koobi karo. Waxaana u rajeynayaa Amb Jamal, mustaqbal ifaaya oo guul-leh, waxaana rajeynayaa in aqoontiisa dowladnimo, kartidiisa, hoggaamintiisa intaba meela kale loogu faa’iideysto.

Ugu danbeyn Wasaaradda Qorsheynta waxaa loo magacaabay oo aan shalay goob-joog ka ahaa markii xilka lagu wareejinaayay oo aan wasaaradda kusoo dhaweynay, Xildhibaan, Mudane Maxamuud Beene-beene oo aan asna ka filayo halkii uu Wasiirkii hore soo gaarsiyay uu halkaas kasii wadi doonno.

Mahadcelin ballaaran shaqaalaha iyo madaxa kale Wasaaradda Qorsheynta Qaranka.

Abdirashid Nur